ՀՀ Լոռու մարզ, Լոռի Բերդի համայնքապետարան․

Ս.թ. օգոստոսի 08-ին ժամը` 12:00-ին Լոռի Բերդի համայնքապետարանի նիստերի դահլիճում տեղի ունեցավՀայաստանի Հանրապետության Լոռու մարզի Լոռի Բերդ համայնքի Ագարակ և ՈՒռուտ բնակավայրերի ջրամատակարարման ցանցի և կոյուղու համակարգի կառուցման և սոցիալական ազդեցությունների վերաբերյալ կազմակերպվող հանրային լսում։

Հանրային լսումը վարեց Լոռի Բերդ համայնքապետարանի աշխատակազմի քարտուղար՝ Անի Մարտիրոսյանը, հանրային լսմանը ներկա էին Հայաստանի տարածքային զարգացման հիմնադրամի ներկայացուցիչներ՝ Համայնքային ենթակառուցվածքների ծրագիր 2, փուլ 3 ծրագրի ղեկավար՝ Հրաչ Զալինյանը, ինժեներ՝ Հովհաննես Գասպարյանը, բնապահպան՝ Ռուբեն Վարդանյանը, տեխնիկական հսկողություն իրականացնող թիմի ղեկավար՝ Անդրանիկ Հովհաննիսյանը, Լոռի Բերդ համայնքի Ագարակ և Ուռուտ բնակավայրերի վարչական ղեկավարները, ավագանու անդամներ և բնակավայրերի բնակիչներ՝ թվով 25 մարդ (մասնակիցների ցուցակը և լուսանկարները կցվում է):

Լսման սկզբում, ողջունելով ներկաներին` Լոռի Բերդի համայնքապետարանի աշխատակազմի քարտուղար՝ Անի Մարտիրոսյանը ներկայացրեց «KFW» գերմանական բանկի կողմից ֆինանսավորմամբ իրականացվող «560 գյուղերի ջրամատակարարման և ջրահեռացման համակարգերի կառուցում» համայնքային ենթակառուցվածքի ծրագրով Ագարակ և ՈՒռուտ բնակավայրերի ջրամատակարարման և ջրահեռացման համակարգերի կառուցման և սոցիալական ազդեցությունների վերաբերյալ կազմակերպված հանրային լսման մասին։ Նշվեց, որ սահմանված կարգով Հայաստանի տարածքային զարգացման հիմնադրամի կողմից ստացվել է գրություն, այնուհետև իրականացվել է հանրային ծանուցման փուլ, ՀՀօրենսդրությանը համապատասխան՝ պատշաճ ծանուցումը տեղադրվել է Լոռի Բերդ համայնքի պաշտոնական կայքէջում, սոցիալական հարթակներում, տպագրվել է նաև «Առավոտ» օրաթերթում և անհատապես իրազեկվել են շահագրգիռ՝ Ագարակ և Ուռուտ բնակավայրերի բնակիչները։ Աշխատակազմի քարտուղար՝ Անի Մարտիրոսյանը խոսքը փոխանցեց Համայնքային ենթակառուցվածքների ծրագիր 2, փուլ 3 ծրագրի ղեկավար՝ Հրաչ Զալինյանին։

Հրաչ Զալինյանը նախ ներկայացրեց կազմակերպության ներկայացուցիչներին, այնուհետև ներկայացրեց, որ նախագծի աշխատանքները իրականացվում են տարբեր բանկերի աջակցությամբ, սակայն ֆինանսավորումը տրվել է Եվրոմիության կողմից՝ 12 միլիոն եվրո արժողությամբ դրամաշնորհ՝ ջրամատակարարման և ջրահեռացման համակարգերի կառուցման համար, ըստ որի վերակառուցվելու են Լոռի Բերդ համայնքի Ագարակ և Ուռուտ բնակավայրերի ջրամատակարարման համակարգերը և կառուցվելու են ջրահեռացման համակարգերը։ Ջրամատակարարման և ջրահեռացման համակարգի վրա ներդրումային ցանցի վրա ծախսվում է 1 միլիարդ 325 միլիոն ՀՀ դրամ, և նախատեսվում է  կառուցել մաքրման կայաններ 1 միլիարդ 600 միլիոն ՀՀ դրամի չափով։ Հրաչ Զալինյանը նշեց, որ որքանով ինքը տեղյակ է ջրամատակարարումը 3 օրը մեկ է իրականացվում, սակայն հավելեց, որ նախագծի շրջանակներում նախատեսվում է 24 ժամյա ջրամատակարարում։ Վերականգնվելու են գոյություն ունեցող ջրամբարները, որոնք չեն շահագործվել, կառուցվելու է ներքին ցանցը, տեղադրվելու են ջրաչափներ։ Աշխատանքները ավարտելուց հետո ջրամատակարարման համակարգը հանձնվելու է «Վեոլիա ջուր» ՓԲ ընկերությանը։

Հրաչ Զալինյանը խոսքը փոխանցեց բնապահպան՝ Ռուբեն Վարդանյանին։ Ռուբեն Վարդանյանը նշեց, որ աշխատանքները իրականացվելու են իրավական նորմերին համապատասխան։ Կազմվել է բնապահպանական և սոցիալ կառավարման պլան, և քանի որ աշխատանքները իրականացվելու են բնակավայրի ներսում վերակառուցվող տարածքները անպայմանորեն կցանկապատվեն, կլինեն ձայնային նախազգուշացումներ, փոշու առկայության դեպքում՝ կօգտագործվեն ջրցան մեքենաներ, աշխատանքները կիրականացվեն ցերեկային ժամերին, որպեսզի անհանգստություն չպատճառեն բնակիչներին։

Խոսքը շարունակեց ինժեներ Հովհաննես Գասպարյանը՝ նշելով, որ քանի որ գործ ունեն խմելու ջրի համակարգի հետ, բոլոր նյութերը և ապրանքները սերտեֆիկացված են։ Միաժամանակ հայտնեց, որ եթե բնակիչների կողմից կլինեն դիտողություններ, խնդիրներ, առաջարկություններ, կան հեռախոսահամարներ, որով կարող են զանգահարել և բարձրաձայնել խնդիրը։

Աշխատակազմի քարտուղար Անի Մարտիրոսյանը հավելեց, որ բնակչության կենսամակարդակի բարելավմանը ուղղված ծրագրեր շատ են իրականացվել և ներկայումս ևս իրականացվում են մեր համայնքում, սակայն նման խնդիրներ չեն առաջացել, քանի որ համայնքի ղեկավարը և բնակավայրերի վարչական ղեկավարները մշտապես տեղում արձագանքում են խնդիրներին, միշտ կապի մեջ են և հետևողական։

Լոռի Բերդ համայնքի ավագանու անդամ, Ագարակ բնակավայրի բնակիչ Հայկ Վարդումյանը հարց ուղղեց՝ ասելով, արդյո՞ք ջուրը ջրամբար մտնելու է պոմպով։

Ինժեներ Հովհաննես Գասպարյանը պատասխանեց, որ կապված տեղադիրքից ծորակի վրա պետք է նվազագույնը ապահովվի 1,5 նվազագույն մթնոլորտային ճնշմամբ ջուր, որպեսզի սարքավորումները աշխատեն, պոմպերը տեղադրվում են դրա համար։

Հայկ Վարդումյանը հավելեց նաև, որ շատ հաճախ վթարներ են լինում, իսկ նման իրավիճակներում ջրամատակարարում կլինի՞։

Ինժեներ Հովհաննես Գասպարյանը պատասխանեց, որ վթարները բերում են անկանխատեսելի հետևանքների, վթարները կարգավորում է ՀՀ հանրային ծառայությունները կարգավորող հանձնաժողովը, որը ունի համապատասխան որոշումներ վթարի դեպքերը կարգավորելու համար։

Հայկ Վարդումյանը հետաքրքրվեց, թե արդյո՞ք վթարները կարող են ազդել ջրի սակագնի վրա։

Հովհաննես Գասպարյանը պատասխանեց, որ չեն կարող, քանի որ Հայաստանի Հանրապետությունում գործում է միասնական սակագին, և ջրամատակարարման և ջրահեռացման դեպքում մնում է նույնը։ Նշեց նաև, որ ծրագրի ավարտից հետո կունենանք էապես կառավարելի ցանց և կայուն ջրամատակարարում, ինչպես նաև ջրի որակի բարձրացում։

Հրաչ Զալինյանը խոսեց նաև շինարարական աշխատանքների ժամկետների մասին՝ նշելով, որ այն կավարտվի 2026թ-ի ապրիլ-մայիս ամիսներին, իսկ մաքրման կայանների աշխատանքների համար ավելի երկար ժամանակ է նախատեսվում՝ մինչև 2027թ-ի երկրորդ եռամսյակ։

Լոռի Բերդ համայնքի ավագանու անդամ, Ագարակի բնակչուհի Աննա Գրիգորյանը հարց ուղղեց, ասելով թե արդյո՞ք ամբողջ գյուղը կոյուղիով կապահովվի։

Հովհաննես Գասպարյանը ասեց, որ ջրահեռացումը ջրամատակարարումից տարբերվում է, նախ կապված տեղադիրքից, թեքությունից, ինչքանով, որ հնարավոր է կիրականացվի, իսկ որոշ մաս հնարավոր է իրականացվի այլ ծրագրով, քանի որ ֆինանսավորումը անսահմանափակ չէ։ Ավելացրեց նաև, որ ֆինանսավորող կազմակերպության հստակ պահանջներից մեկն էլ այն է, որ ջրագծերը չպետք է անցնեն հողամասերի սեփականատերերի տարածքով։

Հանրային լսման վերջում Լոռի Բերդի համայնքապետարանի աշխատակազմի քարուղար Անի Մարտիրոսյանը շնորհակալություն հայտնեց ներկաներից՝ մասնակցության համար։