Հայաստանի կառավարությունը, ոստիկանության բարեփոխումների շրջանակում, 2021 թվականի հուլիսի 7-ին ազդարարեց Երևանում նոր Պարեկային ծառայության մեկնարկի մասին։ Պարեկային ծառայությունը Լոռու և Շիրակի մարզերում գործարկելու, ինչպես նաև Երևան քաղաքի Ծառայությունը նոր կադրերով համալրելու նպատակով է հայտարարվել է բաց մրցույթ:
Մրցույթին կարող են մասնակցել՝
•առնվազն միջնակարգ ընդհանուր կրթություն ունեցող, Հայաստանի Հանրապետության 18-ից մինչև 35 տարեկան և 160 սմ-ից ոչ պակաս հասակ ունեցող քաղաքացիները (արական սեռի քաղաքացիները ընդունելության համար կարող են դիմել, եթե բացի վերոնշյալ պայմաններից, անցել են պարտադիր զինվորական ծառայություն):
•Մրցույթին մասնակցելու համար կարող են դիմել Ոստիկանության ծառայողները, բացառությամբ.
-հեռակա ուսուցման ձևով ասպիրանտուրայում, դոկտորանտուրայում, ոստիկանության ուսումնական հաստատություններում, ինչպես նաև ոստիկանության ուսումնական հաստատությունում պետական պատվերի շրջանակներում սովորողների.
-40 տարեկանը լրացած իգական և 45 տարեկանը լրացած արական սեռի ծառայողների.
-զբաղեցրած պաշտոնում մեկ տարվանից պակաս ծառայության ստաժ ունեցող ծառայողների, բացառությամբ Պարեկային ծառայության ձևավորմամբ պայմանավորված լուծարվող ստորաբաժանումների («Ճանապարհային ոստիկանություն» ծառայություն, ինչպես նաև ոստիկանության համակարգում պարեկապահակակետային ծառայություն իրականացնողներ) ծառայողների:
Դիմելու համար աշխատանքային փորձ չի պահանջվում, անհրաժեշտ է առնվազն միջնակարգ կրթություն:
Ընդունելության ժամանակ կիրականացվի՝
•Առողջության և ֆիզիկական պատրաստականության ստուգում,
•Ընդհանուր գիտելիքների և հոգեբանական նկարագրի թեսթ,
•Հարցազրույց
Ընդունելություն-մրցույթի ստուգումները և հարցազրույցները կանցկացվեն սույն թվականի սեպտեմբերի 22-ից մինչև հոկտեմբերի 22-ը ներառյալ:
Ընդունելություն-մրցույթի համար սահմանվում է 570 տեղ, որից՝
1) 258 տեղը Լոռու մարզի համար,
2) 257 տեղը Շիրակի մարզի համար,
3) 55 տեղը Երևան քաղաքի համար:
Վարձատրության վերաբերյալ՝
•ուսուցման ընթացքում քաղաքացիական անձանց կտրամադրվի 68.000 դրամ հաշվարկային դրամական բավարարում, իսկ ոստիկանության ծառայողների դեպքում՝ աշխատավարձի և աշխատատեղի պահպանում (այս ընթացքում վերջիններս ազատված են լինելու աշխատանքային պարտականությունների կատարումից)։
•ծառայության ընթացքում՝ նվազագույն աշխատավարձը կկազմի 320 հազար ՀՀ դրամ (հարկված՝ 237.400դր.):
•Սահմանված են նաև սոցիալական բարձր երաշխիքներ:
Ոստիկանության կրթահամալիրում հնգամսյա կուրսը հաջողությամբ ավարտելուց հետո սովորողն անմիջապես կնշանակվի պաշտոնում։